MES DA CIENCIA

Estamos no mes da ciencia e xa tedes a vosa disposición unha selección de libros na biblioteca para experimentar, descubrir e aprender.

Agardamos que vos gusten!!!

SAMAIN 2024

O luns, martes e mércores tivemos sesións de contacontos. 

Nenos e nenas de  4º, 5º e 6º contaron contos de medo a nenos e nenas de infantil, 1º, 2º e 3º que quedaron encantados coa actividade.

Parabéns a todos e todas polas magníficas actuacións!!! 

DÍA DAS ESCRITORAS 2024

Un ano máis, este luns, 14 de outubro, conmemoramos na nosa escola o Día das Escritoras.

Desde Infantil ata 6º de primaria, cada aula investigou algunha das escritoras máis relevantes da literatura galega e universal.

Un mural na entrada da biblioteca serviu para realizar un pequeno xogo de recoñecemento destas figuras da arte literaria.

RECOMENDACIÓNS LECTORAS PARA O VERÁN

Chega o verán e con el o final doutro curso escolar máis.

Desde a biblioteca esperamos que tiverades un magnífico ano e que agora poidades gozar plenamente dunhas merecidas vacacións.

Coma sempre, deixámosvos aquí as nosas recomendacións para pasar parte dese tempo acompañadas  e acompañados dun bo libro.

UN SERVIZO VITAL

Esta mañá Alicia e Fran, os pais de Hugo de 2º B, viñeron ao noso cole, xunto con varias compañeiras e compañeiros de Protección Civil, para ensinarnos a importancia do seu traballo ante diversos tipos de emerxencias.

Despois dunha charla informativa na biblioteca sobre as actuación que poden levar a cabo os membros de PC e diversos consellos para evitar accidentes domésticos, as nenas e nenos de 2º saíron ao patio para ir pasando en grupos por un circuito interactivo no que puideron ver os traxes e accesorios das voluntarias,  manipular diversas ferramentas de traballo como os batelumes, realizar unha reanimación cardiopulmonar (RCP), entrar e activar a sirena dos coches de emerxencias ou observar como funciona un extintor.

A sesión fíxose curta, pero resultou moi formativa.

Moitas grazas a Alicia, Fran e aos demais membros de Protección Civil do Oitavén-Tea polo seu labor e por vir compartilo con nós.

AVALIACIÓN DO CLUB DE LECTURA

Despois de participar no club de lectura pedímosvos que avaliedes o seu funcionamento. Para iso deberedes cubrir a enquisa que vos deixamos abaixo respondendo con sinceridade a todas as cuestións.

Premede na imaxe que corresponde ao voso curso, marcade en cada apartado a opción que consideredes máis axeitada e dádelle a enviar.

Moitas grazas pola vosa colaboración!

UNHA MAÑÁ DE TEATRO

Esta mañá as nenas e nenos de Infantil pasárono xenial na función ofrecida pola Escola de Teatro Municipal da que forman parte moitas avoas e avós do noso cole.

Estamos moi agradecidos porque quixeran participar na vida escolar e se ofreceran voluntariamente a alegrar os últimos días de cole antes das esperadas vacacións de verán.

Tiveron a sensibilidade de presentarnos un espectáculo divertido, alegre e, sobre todo, inclusivo, co que lograron a atención de todo o alumnado e que este o pasara realmente ben coas historias que nos ofreceron enriba do escenario.

Foi un pracer tervos con nós. Esperámosvos de novo para o vindeiro curso!

LEMBRANDO AO HEMATOCRÍTICO

O pasado 27 de novembro falecía repentinamente un dos escritores máis queridos da literatura infantil, Miguel López, máis coñecido como El Hematocrítico.

Este ano, o alumnado de 2º leu un dos seus últimos títulos publicados, Morto de fame, unha historia, como case todas as súas, chea de humor e moi divertida.

Como xa non tivemos oportunidade de compartir con el, esta mañá recibimos ao tamén escritor David Rodríguez, que veu para lembralo xunto a nós e facerlle entre todas e todos unha pequena homenaxe.

David volveu rememorar con todas e todos a historia de Draculiño e finalmente rematamos cantando xuntos coa música da súa guitarra. 

ABRAZAR COAS PALABRAS

 

Hoxe, e grazas ao programa de Lectura e Familias, nais, pais e cativada de Infantil e 1º de Primaria gozaron dunha tarde moi especial na nosa biblioteca.

Tivemos a sorte de poder contar coa presenza e a magnífica voz de Charo Pita, que fixo as delicias de todas e todos cos seus contos e os seus cantos.

Debido á gran demanda das familias, e para poder acoller a todas as participantes interesadas na actividade, tivemos que organizar dous pases.

Nunhas sesións, que se fixeron moi curtas, ofreceunos un obradoiro de lectura, Abrazar coas palabras, cheo de emocións e complicidade. Nais, pais, nenas e nenos falaron, riron, xogaron... e levaron para as súas casas e nos seus corazóns algo impagable, a ledicia de compartir momentos únicos e irrepetibles.

DESPEDIDA DE CURSO CON LUIS VALLECILLO

Como xa se achega o fin de curso, na biblioteca quixemos ofrecer unha pequena actividade de despedida para os máis cativos.

O alumnado de Infantil recibiu esta mañá  a visita de  Luis Vallecillo, compositor, dramaturgo, músico e monicrequeiro nacido en Madrid, pero galego de adopción e espallador da nosa lingua e da nosa cultura.

CLUB DE LECTURA E REFUXIADOS

Despois da lectura de Eu son A, de Steve Tasane, no club de lectura de 5º pensamos que sería interesante aprender máis sobre o tema dos refuxiados e contactamos coa Asociación Diversidades de Tui para que nos deran máis información sobre a problemática dos inmigrantes e refuxiados.

Nerea, Alejandra e Paula foron as encargadas de presentar e xustificar a charla ante as súas compañeiras e compañeiros de 5º, aos que convidaron a compartir con elas esta actividade nacida no Club de Lectura.

VISITA DE ANDREA GARCÍA

Hoxe o alumnado de 5º de primaria tivo o pracer de recibir a visita de Andrea García na nosa biblioteca.

A xove escritora conversou coa rapazada sobre o seu libro Animais fantásticos de aldea. O desenvolvemento da trama e o seu final un tanto aberto deixaron intrigado ao noso alumnado, que preguntou por unha posible e futura continuación da historia, algo que Andrea nin negou nin confirmou.

Ao remate da charla, a autora deixou a todas e todos asombrados coa súa destreza como debuxante e rematou asinándolles os seus exemplares do libro.

Quedamos logo pendentes dunha nova publicación.

BRYANNA E ANABEL, MADRIÑAS MONICREQUEIRAS

Esta mañá Bryanna e Anabel de 4º de Primaria foron ás aulas de 6º de Infantil para contarlles a historia Pasiño, de James Simon.

Fixeron un traballo marabilloso adaptando a obra a un espectáculo xenial de monicreques co que os cativos gozaron ao máximo

Parabéns e moitísimas grazas, madriñas lectoras!

21 DE MAIO, DÍA DE DIVERSIDADE

O 21 de maio celébrase o Día da Diversidade Cultural, o Diálogo e o Desenvolvemento.

Estes días tendes xa á vosa disposición na Biblioteca unha selección de títulos cos que poder reflexionar ou traballar nas aulas.

AVALIACIÓN BIBLIOTECA

Como a Biblioteca é un pouquiño de todas e todos, un ano máis pedímosvos que avaliedes o seu funcionamento. Para iso deberedes cubrir a enquisa que vos deixamos abaixo respondendo con sinceridade a todas as cuestións.

Premede na imaxe, marcade en cada apartado a opción que consideredes máis axeitada e dádelle a enviar. Tendes de prazo ata o venres, día 31 de maio.

Moitas grazas pola vosa colaboración!