RAMÓN VEIGA CO ALUMNADO DE 1º

Hoxe estivo de novo con nós Ramón Veiga, autor dunha serie de banda deseñada que gusta moito ao noso alumnado: as historias de Miñoca.

As nenas e nenos de 1º leron Miñoca e coello, unha historia sobre a amizade entre dous seres en aparencia moi distintos, pero que logran facerse amigos a pesar das súas diferenzas.

Esta mañá coñeceron o autor do libro e crearon, coa súa axuda, as súas propias ilustracións de Miñoca.

Ao final marcharon cos seus libros asinados e con ganas de seguir lendo máis historias.

Moitas grazas a Ramón Veiga pola súa visita!

AS NOSAS MADRIÑAS LECTORAS

Hoxe tocou unha nova sesión de contacontos en 6ºB de Infantil da man das nosas madriñas lectoras, Yanira Muíños e Laura Stratta, de 4º de Primaria. ocasión viñeron contarnos a historia de Ranilda.

As nenas e nenos de Infantil quedaron encantados.

Xa estamos desexando recibir de novo a visita das nosas madriñas!

UNHA VIAXE DA MAN DE PAULA RIVAS

 

Esta mañá o alumnado de 3º recibiu a Paula Rivas, autora  de A incrible viaxe de Antía ao cerebro humano, un libro de contidos científicos co que poder aprender gozando da lectura.

A autora redondelana, doutora en neurociencia e cun amplo curriculum profesional en diversas cidades europeas, creou unha obra a medio camiño entre a ficción e a divulgación co fin de achegar á rapazada diversos coñecementos sobre o funcionamento do corpo humano.

A escritora captou a atención das nenas e nenos cunha amena exposición acompañada por algúns “personaxes” da súa historia.

Despois de responder a múltiples preguntas, a autora despediuse do alumnado asinando os seus exemplares do relato.

Foi un privilexio contar coa presenza dunha científica e escritora desta categoría no noso cole!

FALAMOS CON LETICIA BARBADILLO

Hoxe estivo con nós Leticia Barbadillo, autora do libro A botella de lentellas que recibiu o Premio Merlín 2023 de literatura infantil e xuvenil.

Esta obra, que ademais é a primeira da autora, foi o libro escollido este ano como lectura de aula para os grupos de 6º de primaria. 

Licenciada en Comunicación Audiovisual e mestra de infantil no ensino público, Leticia conversou co alumnado sobre o proceso de creación e o fío dos relatos que levan a Manuel, o neno protagonista da novela, a construír a historia da súa familia.

As rapazas e rapaces fixéronlle moitas preguntas e ao remate a autora asinou os exemplares persoais do alumnado e deixou unha dedicatoria para o centro escolar.

Foi un pracer coñecela e desexámoslle moitos máis éxitos no futuro.

O NOSO POEMA VIAXEIRO

 UN PASEO POLA HISTORIA

Aquí tendes xa a composición colectiva que resultou da proposta de Cora con motivo do Día da Poesía: Unha viaxe a través do tempo cunha linguaxe poética froito da imaxinación e creatividade de todo o alumnado do noso centro.

A Cora encantoulle! Que vos parece a vós?

Clica na imaxe para coñecelo.

MADRIÑAS LECTORAS

Esta mañá Yanira Muíños e Marta Vilas, de 4º B sorprenderon ao alumnado de 6º de Infantil cunha sesión de contacontos. Sacrificando o seu tempo de recreo, ambas decidiron ir á aula dos cativos para contarlles a historia de El libro de Lola. 

As nenas e nenos de Infantil estiveron moi atentas e atentos e pasárono moi ben.

Dende a biblioteca tamén queremos agradecerlles a Yanira e a Marta esta fermosa iniciativa.

Esperamos contar de novo con vós en vindeiras ocasións!

8 DE MARZO, MULLERES DE ONTE A HOXE

Relacionando a data do 8M co noso proxecto de centro, este ano, para conmemorar o Día da Muller, decidimos estudar a figura, o papel e a importancia de diversas mulleres ao longo da historia.

Cada nivel encargouse dunha etapa histórica, seguindo o mesmo esquema programado para o traballo do alumnado das diversas aulas na elaboración do noso proxecto, Dúas illas, mil historias.

Así chegamos a este produto final, Mulleres de onte a hoxe.

Foi un gran traballo de investigación das nosas nenas e nenos, que se pode admirar nas aulas e nos corredores de todo o colexio.

Deixámosvos aquí tan só unha pequena mostra exposta na cortiza da biblioteca. 

Parabéns a todas e todos!

DÍA DA MULLER E A NENA NA CIENCIA

A Asemblea Xeral das Nacións Unidas decidiu en 2015 proclamar o 11 de febreiro como o Día Internacional da Muller e a Nena na Ciencia.

Aínda que cun pouco de retraso, na biblioteca non quixemos deixar de conmemorar este feito e, co fin de concienciar o noso alumnado da importancia e o valor da muller tamén no ámbito científico, esta mañá estivo de novo con nós Paula Rodiño, doutora en Ciencias Biolóxicas e profesional do CSIC na Misión Biolóxica de Galicia.

O alumnado de 6º asistiu á súa interesante presentación de diversas mulleres que a nivel mundial, español e galego deixaron unha importante contribución científica ao longo da historia.

Resultou unha charla do máis amena e interesante e dende a biblioteca queremos agradecerlle a Paula novamente que sempre estea aí, disposta a colaborar co noso cole en calquera momento.

Seguiremos contando contigo. Grazas, Paula!

8 DE MARZO, DÍA DA MULLER

Próxima a data do 8M, tendes xa á vosa disposición no panel de suxestións da biblioteca unha primeira selección de libros para coñecer máis sobre a vida e o papel de moitas mulleres importantes que forxaron a nosa historia pasada e presente.

Iremos engadindo máis títulos segundo as vosas necesidades e  intereses.

Animádevos a vir, ollar e levar.

A CIENCIA E O MAR

 Hoxe estivo con nós Lluvia Domínguez, a mamá de Teresa, de 3º B.

LLuvia é bióloga mariña e traballa para o CSIC no Oceanográfico de Vigo. Adícase, entre outras cousas, a detectar metais na auga.

Esta mañá veu á biblioteca para falarlles ás nenas e nenos de 3º en que consiste o seu oficio. O alumnado tivo oportunidade de poñer en práctica diversos experimentos con metais e imáns e aprenderon moitísimas cousas e curiosidades sobre a vida mariña. 

Foi unha xornada moi educativa e unha oportunidade máis para visibilizar o papel da muller no eido científico.

ESTA SEMANA BANDA DESEÑADA

Como sabemos que o cómic ou banda deseñada é un dos xéneros literarios cos que máis gozades, esta semana Cora fixo unha escolla para todos os gustos e idades.

Animádevos a botarlles un ollo. Seguro que atopades algo do voso agrado ou interese. 

23 DE FEBREIRO DÍA DE ROSALÍA

Coma todos os anos, e en colaboración co Equipo de Dinamización da Lingua Galega, no Manuel Padín Truiteiro celebramos o Día de Rosalía co intercambio de agasallos entre o alumnado dos distintos cursos.

Desde Infantil ata 6º de Primaria, cada nena e neno confeccionou a súa flor con diversas técnicas de manualidades e escribiu algunha estrofa dos poemas da nosa ilustre escritora para entregar como agasallo a outra compañeira/-o de xeito aleatorio.

Coma sempre, as flores resultaron do máis colorido e creativo.

Parabéns a todas e todos e...

Feliz Día de Rosalía!

TITIRICIRCUS

Esta mañá gozamos dunha sesión de teatro de monicreques para todos os niveis da man de Tanxarina, a compañía de teatro redondelá con máis de 35 anos de experiencia en facer rir ao público infantil.

A historia, contada por dous vellos traballadores dun circo case desaparecido, transportounos a un mundo de malabaristas, forzudos, equilibristas, faquires, ... nun xogo de interactuación co público, no que o alumnado se sentiu partícipe en todo momento.

Ao rematar a representación, os membros de Tanxarina asinaron o exemplar de Titiricircus que temos na biblioteca e deixáronnos unha unidade didáctica para seguir afondando na historia.

A actividade levouse a cabo grazas á colaboración do Equipo de Dinamización da Lingua Galega e a Biblioteca Escolar.

23 DE FEBREIRO, DÍA DE ROSALÍA

“Eu son libre, nada pode conter a marcha dos meus pensamentos e eles son a lei que rexe o meu destino.”

                                 Rosalía de Castro.

Estes días tendes xa á vosa disposición na Biblioteca as obras de Rosalía para poder ler, reflexionar e traballar nas aulas.

O LATEXO DOS NOSOS CORAZÓNS

Esta mañá recibimos na biblioteca a visita de Claudia Bedoya, de profesión doutora e nai de Zoe, de 3º B.

Falounos de virus e bacterias e da importancia da vacinación. Tamén fixo reflexionar as nenas e nenos sobre a necesidade do lavado de mans e dunha boa hixiene xeral.

De xeito práctico, ensinoulles ás nenas e nenos de 3º algunhas técnicas que poden axudar a salvar vidas. Aprenderon a alertar ao 112 en caso de emerxencia, a realizar unha reanimación cardiopulmonar (RCP), a pór en posición lateral de seguridade a unha persoa inconsciente ou como atender un atragoamento imprevisto.

Tamén trouxo un fonendoscopio profesional co que as nenas e nenos puideron escoitar o latexo dos seus propios corazóns.

Foi unha xornada moi formativa e interesante e dende a Biblioteca queremos agradecer a Claudia a súa colaboración desinteresada.

RECOMENDACIÓN DO CLUB DE LECTURA

 Este ano comezamos o club de lectura de 5º cun libro fácil de ler e que gustou moito a todas as participantes.

Deixámosvos a continuación a súa recomendación.

Se vos interesa non dubidedes en pasar pola biblio.

ENTROIDO 2024

Este ano é Cora a que, co seu disfrace de pirata, dá os mandados. 

Podemos vir disfrazados como queiramos durante a semana. 

LIBROS PARA GOZAR DO ENTROIDO

 

Xa estamos en tempo de entroido e, coma cada ano, Cora seleccionou para vós algunhas lecturas que xa están no panel de exposicións da biblioteca.

Esperamos que vos agraden!

DÍA DA ILUSTRACIÓN

Cada 30 de xaneiro dende o ano 2013, coincidindo coa data na que se pensaba que nacera Castelao, celébrase en Galicia o Día da Ilustración.

Para celebralo presentámosvos un traballo que nos fixo chegar Lola, de 5ºB, e que nos pareceu verdadeiramente magnífico.

Moitas grazas, Lola, por tan fermoso traballo. Estamos seguros de que, se ti queres, tés futuro no mundo do libro e da ilustración.

Parabéns! 

UN CUMPLEAÑOS INOLVIDABLE

PREMIOS AO RETO DE NADAL

Esta mañá fixemos entrega dos premios ao reto de Nadal deste ano. Aínda que foron poucos os participantes, a calidade dos traballos presentados era tan boa que se decidiu outorgar máis dun premio por nivel.

Os agasallos foron entregados a:

• Noelia Suárez de 2ºA de Primaria.
• Lucas Fernández de 2ºB de Primaria.
• Ainhoa Alonso de 5ªA de Primaria.
• Lucía Castro de 5ºA de Primaria.

NOVA ZONA DE XOGOS

 Esta mañá ao chegar ao cole atopamos unha sorpresa na entrada da biblioteca: Unha nova zona de xogos exterior, cómoda e agradable, onde poder entreternos e aprender durante as horas de recreo.

Foi un bonito agasallo do que esperamos que todas e todos poidades gozar moito tempo.

LECTURAS POLA PAZ NO CLUB DE LECTURA

 No Club de Lectura “Compartindo Aventura” iniciamos esta semana a un novo libro: Eu son A, de Steve Tasane.

Trátase da historia dun rapaz sen documentos nin familia, que vive nun campo de refuxiados calquera, dos moitos que desgraciadamente seguen existindo non moi lonxe das nosas cómodas casas.

Unha lectura axeitada para estas datas próximas á conmemoración do Día da Paz e da que vos daremos a nosa opinión cando rematemos o libro.

UNHA HISTORIA DE CORSARIOS

Seguindo co noso proxecto de centro, o alumnado de 6º de Primaria creou un conto titulado Dúas illas e unha historia de corsarios.

Nesta ocasión foi para sorpresa e emoción das nenas e nenos de Infantil, que asistiron na biblioteca principal á dramatización e posta en escena da historia.

As sesións de contacontos foron todo un éxito e a rapazada de Infantil saíu moi contenta.

Parabéns ao noso alumnado de 6º pola súa iniciativa e creatividade!

E xa sabedes, ... se queredes ler o conto, entrade no apartado do noso proxecto Dúas illas, mil historias.

DÍA DA PAZ E NON VIOLENCIA

O  30 de xaneiro conmemoraremos un ano máis o Día Escolar da Non Violencia e a Paz.

Cora comezou xa a seleccionar unha serie de libros cos que poderedes reflexionar sobre diversos valores como a amizade, a tolerancia ou a solidariedade.

Están á vosa disposición no panel de exposicións da biblioteca e iranse engadindo novos títulos nos vindeiros días.

Esperamos que vos gusten!

UN NADAL NA ENSEADA DE SAN SIMÓN

 E aquí están por fin os traballos participantes no noso reto de Nadal.

Tendo como escenario a nosa ría e a súa enseada de San Simón, o noso alumnado e as súas familias crearon unhas fermosas historias en banda deseñada.

Clica e entra para coñecelas.