DESPEDIMOS O CURSO

Chegamos ao fin deste curso e Lara e Ian foron nesta ocasión os encargados de darnos a despedida e desexarnos a todas e todos un feliz verán a través das ondas de Radio Negueirós.

Xa podedes acceder ao programa na nosa lapela de Radio.

Feliz verán!

LECTURAS PARA O VERÁN

Remata un curso máis e chega de novo o verán, as vacacións, o tempo libre...

Desde a Biblioteca, coma sempre, queremos animarvos a pasar parte dese tempo cun bo libro nas mans.  

Deixámosvos a continuación a selección que fixo Cora pensando en todas e todos vós. Lembrade que se queredes saber máis de cada título só tendes que clicar na imaxe.

Bo verán e felices lecturas!

Vémonos en setembro!

NOVO GAÑADOR DO CONCURSO DE RADIO

E aquí tendes o gañador do noso último concurso de radio: Markel Morán Couto, de 6ºB de primaria. Parabéns!

Con el despedimos por este curso esta sección tan agardada dos nosos programas de radio, pero...

En setembro voltamos!

HISTORIAS, RISAS E ILUSTRACIÓNS

Este ano o alumnado de 5º de primaria leu o libro Milú e o edificio das persoas extraordinarias, de Abel Tomé.

Como nesta ocasión non foi posible recibir a visita do autor, hoxe o alumnado gozou dunha sorpresa moi especial, un encontro co contacontos e ilustrador Benxamín Míguez.

Benxamín, recoñecido narrador, ilustrador e animador sociocultural, ademais de mestre, conversou coa rapazada sobre a lectura de Milú e despois fixo rir e viaxar ao alumnado cunha fantástica historia chea de poderes máxicos e moita imaxinación.

Moitas grazas por agasallarnos cunha xornada tan divertida!

HISTORIAS QUE CHEGARON AO NOSO CONCELLO II

Seguimos coa rolda de entrevistas ás familias do noso alumnado inmigrante. O pasado 4 de xuño foron Diego, Avril. Carlos e Sabela, de 5º de primaria, os encargados de conversar con varias mamás da nosa comunidade educativa.

Claudia, Eliana, Andrea, Marlene e Anisleidy ofrecéronnos un novo programa moi emotivo no que nos falaron das súas experiencias antes e despois da saída dos seus países de orixe: perdas, ilusións, morriña, recordos, plans de futuro...

Para as que non tivestes ocasión de escoitalas en directo, xa podedes acceder ao programa na nosa lapela de Radio Negueirós.

DESPEDIMOS O CLUB DE LECTURA EN 5º

A aventura do club de lectura chegou ao seu fin en 5º de primaria.

Hoxe tocou xornada de despedida e as integrantes recibiron un pequeno agasallo como lembranza do seu paso por este Compartindo Aventura no que participaron ao longo deste curso, partillando historias, sentimentos, emocións, xogos e risas.

Esperamos vervos de novo o vindeiro curso!

EXPOSICIÓN DO PROXECTO EN INFANTIL

O alumnado de 6º de infantil demostrounos esta mañá que os peques tamén saben facer unha magnífica exposición do traballo realizado ao longo de todo o curso.

Despois de ter estudado moitas cousas sobre o Reino Unido, hoxe quixeron compartir con nós parte do aprendido grazas ao proxecto de A viaxe que nos une.

Fixérono xenial! Parabéns a todas e todos!

COMPARTINDO AVENTURA FINAL EN 6º

O club de lectura Compartindo Aventura de 6º puxo hoxe punto e final a este curso cunha actividade do máis amena e divertida co mestre e poeta Anxo Iglesias.

Despois de ler Tacón, punta, tacón e Unha nova dimensión, o alumnado de 6ºB compartiu unha mañá moi especial co seu autor.

Durante o encontro, a rapazada descubriu que a poesía non ten por que ser aburrida, senón que pode convertirse nun xogo marabilloso de palabras "patas arriba", ritmos e aturuxos.

Conversaron co autor sobre identidade, mulleres bravas, fixeron rimas, divertidos equilibrios coas palabras que compoñen o libro... e acabaron traballando poesía, incluso do xeito máis sorprendente e incrible: coa retransmisión dalgunha das mellores xogadas do Celta de Vigo. Podedes crelo?

Coma sempre, foi un verdadeiro pracer recibir a Anxo Iglesias e partillar con el momentos inesquecibles.

Moitas grazas pola túa visita, polo teu dinamismo, pola túa proximidade e, sobre todo, por contaxiarnos a túa paixón pola lectura en galego! 

LIBROS, TEATRO E IGUALDADE

Xa case despedindo o curso, esta mañá tivemos unha última sesión de animación lectora a cargo deTrécola Teatro.

Co seu espectáculo A pequena osa quere xogar fixeron reflexionar o alumnado de infantil e 1º ciclo de primaria sobre o valor da amizade e a importancia da igualdade.

As historias dunha pequena osa e dunha Brancaneves moi reivindicativa fixeron as delicias de toda a rapazada. 

Pasámolo xenial!

A VIAXE QUE NOS UNE CHEGA AO SEU DESTINO FINAL

Case a piques de rematar o curso, esta semana as distintas aulas están levando a cabo as súas exposicións finais do proxecto A viaxe que nos une,

Entramos no avión que nos leva ao destino final de cada un dos países traballados e unhas guías especiais recíbennos na biblioteca para explicarnos o mellor do seu país e as cousas que non debemos perdernos en cada un deles: a súa localización, algo da súa historia, da súa bandeira, lugares que visitar, comidas típicas, curiosidades...

Á saída do avión todo o alumnado tivo que pasar pola “aduana” para selar o seu pasaporte.

A aventura resultou incrible! Parabéns a todas as  participantes!

OLAIA SENDÓN E O COIDADO DO NOSO MAR

Hoxe o alumnado de 2º de primaria recibiu a visita de Olaia Sendón, autora do libro A crebeira Marabillas.

A escritora contounos como se inspirou en persoas reais para crear os personaxes desta fermosa historia que nos fala de ecoloxía, amor, empatía e que deixa unha fermosa sensación final de círculo pechado.

A rapazada tamén tivo ocasión de facerlle preguntas e ao finalizar levaron os seus exemplares persoais asinados pola autora.

MARTA VILLAR E OS PEIDOS DE SULTÁN

O libro de lectura escollido este ano en 3º de primaria foi Os Peidos Máxicos de Sultán, da escritora Marta Villar.

Esta mañá, a autora visitou a nosa escola e acompañou o alumnado nunha sesión moi amena e dinámica na que houbo conversa, risas, pombas de xabón e moita diversión.

Ao finalizar inda tivo tempo para asinar os exemplares do alumnado, que marcharon felices despois desta experiencia tan alegre e agradable.

PROGRAMA ESPECIAL

Hoxe tivemos un programa de radio especial dedicado ás familias, a todas as familias.

Uri, de 1º A, Teo, de 1º B, Julia, de 2º A e Abril, de 2º B foron as encargadas de realizar a retransmisión e fixérono xenial.

Xa o tendes á vosa disposición na lapela de Radio Negueirós.

Esperamos que vos guste!

NOVO PROGRAMA DE RADIO NA BIBLIO

Despois de varios días de preparación, xa tendes dispoñible o último programa de radio, do pasado 30 de abril.

Nesta ocasión foron Rosalía, Sabela, Lian e Alicia, de 5º B, as encargadas de dirixilo e Claudia, Jenny e Lara, de 1º A trouxéronnos a sección de Radio Conto coa historia de Bebé Bigotes.

Para acceder ao programa só tendes que entrar na lapela de Radio Negueirós.

QUEREMOS SABER MÁIS SOBRE BEGOÑA CAAMAÑO

 

Xa moi pretiño do día das nosas letras, do 17 de maio, ao longo desta mañá o alumnado de 5º veunos presentar a figura de Begoña Caamaño, falándonos da súa obra e da súa faceta máis persoal.

Organizado en quendas, o alumnado dos cursos máis baixos, de infantil a 4º de primaria, foi pasando pola biblioteca para saber máis sobre a muller que é homenaxeada este ano no Día das Letras Galegas.

O alumnado de 5º fixo un traballo de investigación e exposición moi serio e rigoroso e incluso prepararon actividades lúdicas para os máis pequenos. Estivo xenial!

Moitos parabéns!

VISITA DO ILUSTRADOR ANXO FARIÑA

Despois de ler o seu libro A chave da Atlántida, o alumnado de 6º de primaria recibiu hoxe o autor e ilustrador Anxo Fariña.

O escritor, licenciado en Belas Artes, conversou coa rapazada sobre o libro, como xurdiu a idea, o traballo creativo e faloulles dos seus proxectos actuais en inglés.

Para rematar, fíxolles unha demostración das súas dotes como ilustrador, coa habitual mestría e axilidade que o caracterizan, e finalizou o encontro asinando os exemplares do alumnado.

AVALIACIÓN DA BIBLIOTECA

Remata un curso máis e de novo queremos saber a vosa opinión sobre o funcionamento da biblioteca e as vosas experiencias nela. É por iso que vos pedimos que cubrades a enquisa que vos deixamos abaixo, respondendo con sinceridade a todas as cuestións.

Premede na imaxe, marcade a opción que consideredes máis axeitada e dádelle a enviar. Tendes de prazo ata o venres, día 29 de maio.

Moitas grazas pola vosa colaboración!

DÍA INTERNACIONAL DAS FAMILIAS

O 15 de maio celebramos o Día Internacional das Familias, unha data que oficializou a Asemblea Xeral das Nacións Unidas en 1994 co fin de concienciar a toda a poboación sobre o papel que xogan as familias, todos os tipos de familias, na formación e coidado das súas fillas e fillos.

No panel de exposicións da biblioteca xa tendes a escolla que fixo Cora sobre esta temática para ampliar a vosa visión e os vosos coñecementos sobre os distintos núcleos familiares.

Vinde botar un ollo!

UN ENCONTRO CON ANTONIO M. FRAGA

Este ano o alumnado de 4º de primaria leu a novela de Antonio M. Fraga, Papá Caníbal, un enredo tolo, disparatado e moi divertido que ten lugar na noite de Samaín.

Hoxe o seu creador visitou o noso cole e conversou co alumnado, que incluso se atreveu a facerlle algunhas suxestións. Ao final o autor asinou os exemplares das nenas e nenos para que lles quede un bo recordo da actividade.

Aínda que Antonio Fraga estudou enxeñería industrial, a súa vocación literaria levouno a escribir un bo número de obras para a literatura infantil e xuvenil.

Con Papá Caníbal logrou enganchar o seu lectorado, que seguramente, en breve, se animará a coñecer algo máis da súa obra. 

NOVO GAÑADOR DO CONCURSO DE RADIO

Xa temos novo gañador do noso concurso de radio!

Nesta ocasión no sorteo saiu seleccionado, como acertante das preguntas do concurso, Martiño Taboada Torrado, de 4º B, que xa pasou pola biblioteca para recoller o seu agasallo.

Parabéns, Martiño! 

CHOVE! CON RAMÓN VEIGA

Esta mañá o alumnado de 1º recibiu na biblioteca a Ramón Veiga, co que conversaron e aprenderon a ilustrar e facer banda deseñada.

As nenas e nenos leran Chove!, unha das novas historias de Miñoca, o personaxe creado por este autor e que tanto éxito ten entre a cativada, e ao final o escritor asinou os seus exemplares para que lles quede como viva lembranza deste día.

COIDAMOS A NOSA VISTA

Hoxe as nenas e nenos de 1º de primaria aprenderon a ser heroes e heroínas cunha supervista.

Laura, a mamá de Enzo, de 1º A, traballadora nunha óptica en Arcade e especialista no tema, veunos dar unha lección de como coidar os nosos ollos para preservar unha boa vista ao longo da nosa vida.

Foi moi divertido adestrar a visión dun xeito tan ameno e fixérono tan ben todas e todos que ata recibiron un diploma.

Moitas grazas, Laura! 

ACTIVIDADES NA BIBLIOTECA MUNICIPAL

Esta mañá, e coincidindo coa celebración do Día do Libro, o alumnado de 6º de primaria baixou á Biblioteca Luís Seoane para divertirse e ampliar coñecementos.

Foron acollidos por Patri, a nosa bibliotecaria municipal, e Sara, colaboradora habitual nas actividades arredor do libro e da lectura.

Entre outras cousas, aprenderon o nome das partes que compoñen un libro e xogaron ao LiteraTour, poñendo en práctica os seus coñecementos sobre cultura, libros, autores,..., un xogo de cartas cheo de retos e desafíos literarios de todo tipo.

Alumnado e profesorado pasouno xenial e foi unha moi boa maneira de celebrar o Día do Libro.

CITA A CEGAS CUN LIBRO

Para conmemorar o Día do Libro, este ano a biblioteca propuxo unha actividade tamén para as persoas adultas: “Cita a cegas cun libro”.

A proposta consistía en que os membros da comunidade que quixeran participar trouxeran da súa casa un libro, empaquetado e cunha pequena pista sobre a temática do mesmo, pero sen desvelar nin o título nin a autoría da obra.

Os libros estiveron expostos durante toda a mañá para que as participantes puideran ir lendo as notas, e na última hora do día cadaquén fixo a súa escolla.

A actividade resultou moi apreciada e dela saíron xa varias recomendacións lectoras.

CELEBRAMOS O DÍA DO LIBRO

                          “... porque cando lemos

                              todo é posible,

                              sobre todo o imposible”.

                                                                                  Eva Mejuto

Este 23 de abril, ao igual que en anos anteriores, propuxemos a actividade de Adopta un Libro coa intención de darlles unha segunda vida a todas aquelas obras que, por falta de espazo, necesitamos expurgar da biblioteca.

Coma sempre, a actividade resultou todo un éxito.

QUE CONTO CONTAMOS?

Esta tarde tivemos a sorte de recibir no noso cole a escritora e actriz Paula Carballeira.

Paula é moi coñecida como actriz de teatro e por participar en series da Televisión de Galicia, pero sobre todo é unha grandísima narradora de contos procedentes da tradición oral aos que ela lles engade a súa particular visión e as súas propias experiencias.

Escribe relatos infantís e xuvenís, poesía, ensaio e teatro e moitos dos seus libros están traducidos a varias linguas. Recentemente acaba de recibir o Premio Nacional de Literatura Dramática pola obra As alumnas.

Enmarcado no programa de Lectura e Familias, a xenial contadora de historias ofreceu para familias e alumnado o obradoiro de narración oral Que conto contamos?

Durante unha hora, que pareceron minutos, maiores e cativos pasárono xenial, colaborando no curso da narración e participando activamente dos contos.

ANXO MOURE VOLVE AO NOSO COLE

 Esta mañá as nenas e nenos de Infantil pasárono xenial na compaña de Anxo Moure e o seu peculiar nubinete co que hoxe chegou ata o noso cole.

Como o tempo acompañaba, saimos ao patio para  xogar, cantar e bailar detrás do nubinete, e celebrando a chegada da primavera e o respecto pola natureza, que Anxo sempre tenta inculcar na cativada.

Foi unha mañá moi fermosa e divertida.

23 DE ABRIL, DÍA DO LIBRO

Achégase o 23 de abril, data na que celebramos o Día do Libro e animamos á lectura.

Cora xa fixo unha selección de materiais para que poidades pasar pola biblioteca e facer a vosa elección: Coñecer os clásicos de Cervantes, autoras galegas como Eva Mejuto e o seu fermoso Cando leo, contos sobre libros e persoas lectoras, aventuras diversas,...

E xa sabedes que se non atopades nada do voso interese no panel de suxestións, podedes preguntarlle á encargada da biblioteca.

Felices lecturas!

DÍA MUNDIAL DA ARTE

O pasado 1 de abril foi o Día das Artes Galegas e mañá, día 15, conmemórase o Día Mundial da Arte. Para celebrar estas datas, esta mañá recibimos no cole a artista galega Loli Beloso

Ademais de ser coñecida como escritora, hai uns anos Loli decidiu embarcarse nun proxecto moi especial: crear unha colección de xoias solidarias. Con elas pretendía, por un lado, render homenaxe a un notable intelectual como foi Isaac Diaz Pardo, e por outro, aportar un granciño de area na recadación de fondos para a investigación do cancro a través da Fundación Pública Galega de Medicina Xenómica, dirixida por Ángel Carracedo, a quen coñeceu grazas a Díaz Pardo.

Hoxe en día, todo canto Loli recada a través da venda dos seus libros, das xoias e agora incluso dos seus bolsos, vai parar, de xeito totalmente altruista, a esta fundación.

Esta mañá estivo no noso cole para falar co alumnado de 6º de primaria sobre a figura humana e creativa de Díaz Pardo e a importancia do seu legado artístico, principalmente a través da famosa cerámica de Sargadelos.

Tamén aproveitamos a súa visita para facerlle entrega da recadación da carreira solidaria, que celebramos o pasado venres, día 10, para conmemorar o Día Mundial da Saúde, e que foi todo un éxito.

7 DE ABRIL, DÍA MUNDIAL DA SAÚDE

Para conmemorar o Día Mundial da Saúde, que se celebra o 7 de abril, desde a biblioteca propuxemos a celebración na escola dunha carreira solidaria coa finalidade de recadar fondos para a investigación.

O pasado venres, día 10,  celebramos a carreira baixo o lema “ Xuntos pola saúde. Apoiemos a Ciencia”.

Decidimos que a recadación sería enviada á Fundación Pública Galega de Medicina Xenómica, dirixida polo doutor Ángel Carracedo, unha entidade sen ánimo de lucro que se dedica á investigación para a prevención,  diagnóstico e tratamento de enfermidades hereditarias e oncolóxicas.

A iniciativa resultou todo un éxito e lográronse recadar 927,21 €, que lle foron entregados pola directora do cole, Olalla Obelleiro,  a Loli Beloso, colaboradora da Fundación.

NOVO RECUNCHO DE RECOMENDACIÓNS LECTORAS

Estreamos un novo recuncho na biblioteca onde poderedes expor as recomendacións lectoras que queirades facerlles ás vosas compañeiras e compañeiros.

As vosas opinións sobre diversos libros estarán un tempo no taboleiro de exposicións e logo irán pasando a un cartafol no que poderán consultarse durante todo o curso.

Xa tendes no panel as primeiras recomendacións. Esperamos que vos sexan de utilidade!

XA ESTÁ AQUÍ UN NOVO PROGRAMA DE RADIO

Rematamos o trimestre cun novo programa de radio, nesta ocasión conducido polo alumnado de 5º A.

Non perdades as novas deste mes nin a colaboración especial do alumnado de 6º B de Infantil que nos entusiasmou coa súa narración do conto A toupeira Rosa!

Xa podedes acceder ao programa completo na lapela de Radio Negueirós.

27 DE MARZO, DÍA MUNDIAL DO TEATRO

Este venres, 27 de marzo, conmemoramos o Día Mundial do Teatro cunha actividade moi especial.

O alumnado de 1º, 2º e 3º tivo o pracer de asistir á representación teatral de Tespis e o seu carro, unha obra orixinal escrita e dirixida por Andrea Castro, directora da Escola Municipal de Teatro de Soutomaior.

A rapazada asistiu moi atenta ao espectáculo, onde nos falaron do nacemento do teatro e a historia das súas orixes a través dunhas peculiares personaxes que representaban a Comedia, a Traxedia, a Música e o Mimo.

Ao rematar a historia, pasárono xenial cantando e acompañando as compoñentes do grupo teatral.

Moitísimas grazas a Rocío, Suso, Melchor, Marcos e, por suposto, a Andrea por acoller tan positivamente a nosa proposta e ofrecernos un espectáculo tan divertido e marabilloso.

Estamos desexosas de volver contar con vós en vindeiras ocasións.

CONCURSO DE RADIO

 Xa temos gañadora do noso 1º concurso de radio!

A agraciada foi Mª Carmen Granja Míguez, de 3º B, e esta mañá pasou pola biblioteca para recoller o seu agasallo.

Parabéns, Carmen! 

LECTURAS AO SOL

Aproveitando o bo tempo, esta mañá o club de lectura de 5º saíu ao patio para poñer punto e final ao último libro do trimestre.

Andrea García Martínez é a autora de Animais fantásticos de aldea, un libro cheo de misterio e imaxinación que gustou moito ás compoñentes do club.

Xa estamos desexando empezar unha nova aventura!

OBRADOIRO DE RADIO CON DAMIÁN ALONSO

Esta mañá o alumnado de 5º participou nun obradoiro de radio impartido polo actor e formador de voz e podcasts, Damián Alonso.

Tras ofrecer unha formación sobre como preparar un guión, a elaboración dos textos ou o manexo da voz e dos nervios, o alumnado dividiuse en equipos para poñer en práctica todo o aprendido.

Cada grupo acordou, redactou e elaborou o seu propio programa de radio e posteriormente manexaron a mesa e os equipos para gravar o seu propio podcast orixinal.

A actividade resultou moi amena e produtiva e o alumnado pasouno xenial.

Foi un pracer contar de novo contigo, Damián! Ata outra!

17 DE MARZO, DÍA DO CÓMIC

Este martes, 17 de marzo, conmemórase o Día do Cómic e do Tebeo.

Cora xa fixo unha selección de libros para que poidades mergullarvos nun mundo no que o que prima é a ilustración e o humor.

Pasade pola biblioteca e collede o que máis vos apeteza. Hai algunhas novidades!

CONTACONTOS NA BIBLIOTECA PÚBLICA

Esta mañá o alumnado de 1º ciclo visitou a Biblioteca Luis Seoane para asistir a unha sesión de contacontos a cargo de Ángeles Escribano Guiance.

Patri, a nosa bibliotecaria de referencia, deunos a benvida, e Ángeles entregounos unhas entradas moi especiais para asistir ao seu espectáculo de “Había una vez”.

Coma sempre, queremos agradecer as propostas de colaboración e a boa acollida que sempre nos ofrecen na Biblioteca Pública do noso concello.

Volveremos!

CHEGA UN NOVO PROGRAMA DE RADIO

Marzo trae moitas cousas que contar. Nesta ocasión foi o alumnado de 4º o encargado de retransmitirnos as novas máis interesantes deste mes. Faláronnos do Día do Escultor, do Día da Muller, dos avances no noso proxecto de centro,... e ademais estreamos unha nova sección: Radio Concurso.

Antón e Aixa, de 3º, foron os colaboradores especiais desta semana para a  sección de Radio Conto.

Xa podedes escoitar o programa ao completo na nosa lapela de Radio Negueirós.

Esperamos que vos guste!

8 DE MARZO, DÍA INTERNACIONAL DA MULLER

Cada 8 de marzo rememoramos a loita histórica das mulleres pola igualdade de dereitos, pola mellora das súas condicións laborais e polo recoñecemento da súa participación social.

E para aprender máis sobre a importancia e as aportacións da muller ao longo da historia, Cora xa ten preparada unha selección de obras para todas as idades.

Pasade pola biblioteca!