29 DE ABRIL, DÍA MUNDIAL DA DANZA

Mañá, mércores, 29, celébrase o Día Mundial da Danza.

Dende o Salón do Libro de Pontevedra puxéronse en contacto con Pesdelán e estes artistas deseñaron un espectáculo exclusivo para este tempo de confinamento.

Empregando a linguaxe universal da danza, farán un percorrido polo baile tradicional galego, mais tamén polo de Euskadi, Brasil ou Portugal.

A finalidade é que vós, familias, bailedes, gocedes e celebredes xuntos este fermoso día, aínda que non se poida saír da casa.

Deixámosvos aquí o enlace no que poderedes acceder ao espectáculo, aínda que tamén o poderedes facer a través das canles habituais do Salón (Facebook, Instagram ou Youtuve). 

Será mañá, mércores, 29, ás 12:00 horas.

https://www.salondolibro.gal/

Animádevos, e a bailar en familia con Pesdelán!!

Pesdelan from merlo branco producións on Vimeo.

AGRADECEMENTO

Rematada a Semana do Libro, queremos agradecervos a participación nos retos propostos dende a Biblioteca. Estamos moi felices coa vosa resposta e orgullosos dos magníficos traballos presentados. Parabéns a todas e todos!!

DÍA DO LIBRO 2020

Hoxe, 23 de abril, festexamos o Día Internacional do Libro, que naceu coa intención de fomentar a lectura e defender a industria editorial e os dereitos de autor.

A idea desta conmemoración xurdiu en España en 1926, aínda que as súas orixes están ligadas á celebración do San Jordi en Cataluña, onde era costume que os homes lle regalasen unha rosa ás mulleres e estas, a cambio, os agasallasen cun libro.

Comezouse celebrando o 7 de outubro, data na que se cría que nacera Miguel de Cervantes, autor do Quixote, pero cando se descubriu que isto non era certo, trasladouse a conmemoración para o día da súa morte, o 23 de abril, coincidindo así coa festividade de San Jordi.

Finalmente, en 1995, a UNESCO estendeu a celebración a outros países do mundo coa proclamación deste día como o Día Internacional do Libro e dos Dereitos de Autor, atendendo á “casualidade” de que se correspondía coa data do falecemento de Cervantes e coa do nacemento e morte de William Shakespeare.

Aínda que hoxe non poidamos saír á rúa nin mercar un libro co que agasallar a algún dos nosos seres queridos, dende este recuncho da Biblioteca queremos animarvos a celebrar dalgún xeito este día.

Deixámosvos aquí algunhas propostas de lectura:

Preme nas imaxes para acceder aos libros

E se preferides escoitar, ofrecémosvos este coñecido conto infantil: 

O incrible neno devorador de libros.

 (Versión en castelán)

 (versión en galego)

ESTAS SON AS VOSAS RESPOSTAS AOS NOSOS RETOS

RETO 1:

Unai de 2ºB creou esta bonita historia

Alexia Gómez de 6ºB creou para nós esta bonita narración.

Paula Gómez de 1ºA ofrécenos a súa historia.

Blanca Otero de 3ºB déixanos aquí a narración que ideou para este reto. 

Sara Martínez de 2ºB creou para todos nós esta imaxinativa historia.

Luján de 3ºB envíanos este relato.

Esta é a historia que nos ofrece Juan Canosa de 5ºA.

Aquí escoitamos a Noa Gutierrez de 3ºC

Sergio Dominguez de 2ºA ofrécenos a súa historia

 Sabela Granja de 2ºA envíanos o seu conto.

Esta é a proposta que nos envía Ramón Granja de 5ºA.

Fermosa historia contada por Mateo Quintás de 6º Infantil B

Cael Wam Zalimy, de 5º C, preséntanos esta outra historia en inglés

 

Uxía Granja de 3ºB, tamén nos manda a súa historia.

23 de abril, Día do Libro

Tomar un libro nas nosas mans sempre é unha agradable maneira de pasar o tempo. Con el podemos esquecer os nosos problemas por un tempo, soñar, evadirnos, vivir novas aventuras, aprender, emocionarnos...

Este ano celebramos o Día do libro nunhas circunstancias moi especiais, pero seguro que, precisamente por iso, os libros foron nestes días uns dos nosos mellores amigos.

Por iso, dende a Biblioteca queremos proporvos hoxe unha serie de retos cos que podedes conmemorar esta data. Aí van:

RETO 1: Crear unha breve historia a partir dos títulos dalgúns libros que teñades pola casa.

Deixade voar a vosa imaxinación e poderedes crear calquera historia. A temática é totalmente libre.

RETO 2: Lendo en familia.

Envíanos unha foto destes días na que ti ou a túa familia aparezades lendo. Pode ser un libro, o periódico, unha revista ... o que queirades.

Animádevos a participar e enviádenos os vosos retos ao correo da biblioteca: 

biblioteca.manuelpadintruiteiro@gmail.com

indicando no asunto RETO BIBLIOTECA. Non esquezades incluír o voso nome e curso. Iremos colgando no blog da biblioteca as propostas recibidas.

Esperamos impacientes as vosas achegas.

Feliz Día do Libro!!

SEMANA DA DIVERSIDADE

Do 9 ao 13 de marzo estaban previstas toda unha serie de actividades para celebrar a Semana da Diversidade sexual e Familiar.

Dende a biblioteca expuxéronse unha selección de libros encamiñados a traballar co alumnado a temática da diversidade sexual, os diferentes tipos de familia e, ante todo, o respecto polas diferenzas.

Dende os máis cativos de Infantil ata os maiores usaron estes libros na aula ou pasaron pola Biblioteca acompañados das súas titoras e titores para coñecer algunhas das historias e reflexionar xuntos sobre elas.

Leváronse a cabo sesións de contacontos tanto no espazo infantil como na Biblioteca central.

Ademais, nas aulas realizáronse diversas actividades formativas e de creatividade. A intención era pór unha pequena semente no noso alumnado co fin de formar uns futuros adultos máis tolerantes e empáticos.

O venres, 13, estaba previsto montar un mural no patio cos traballos realizados nas aulas ao longo de toda a semana. O anuncio da suspensión das clases impediu que se rematara, pero á volta tentaremos retomar o tema e ensinarvos aquí o chulo que quedou.

O Salón do Libro tamén na rede

Como cada ano, o Salón do Libro de Pontevedra abría as súas portas para una nova edición que levaba por título “O Humor”, a celebrar do 6 ao 27 de marzo. Porén, o día 12 víase na obriga de cancelar toda a súa programación sen posibilidade de reapertura no presente ano.

Dende ese momento, a organización traballou na maneira de adaptarse ás circunstancias e facernos chegar unha boa parte do seu programa. A través da web poderedes acceder a un montón de recursos e propostas coas que entreterse nestes días de obrigado confinamento: vídeos con obradoiros, contacontos, visitas virtuais...

SALÓN VIRTUAL

Deixámosvos aquí algunhas mostras do que nos ofreceu ese Salón do Libro virtual neste ano 2020. Animádevos a buscar outras!

Torradas divertidas.

O León, por Pavís Pavós


Celebramos a primavera.

Creando o noso buscacacas.

As nubes desde o Salón

Malabares na casa

Materiais para unha situación excepcional

Como xa levamos moitos días de corentena,  dende a Biblioteca queremos poñer á vosa disposición algúns recursos literarios que vos poidan axudar a pasar o tempo dun xeito máis ameno. Grazas á atención da distribuidora Consorcio Editorial Galego e á solidariedade e xenerosidade de moitos e moitas creadoras e editoriais, podemos achegarvos unha serie de materiais educativos de balde para facer máis levadía esta situación excepcional.

Preme no nome da editorial e poderás acceder aos contidos.

Campaña "Con vós na casa": Descarga de lecturas para tódalas idades  Como liberar o potencial do voso neno: Kit completo de actividades Montessori 0-2 anos Campaña "Olla O Papagaio": Descarga de exemplares do xornal Contos contados en Kalandraka TV Dende o seu grupo A Xanela do Maxín ofrece o video completo da obra: A toupiña que quería saber quen lle fixera aquilo na cabeza. Podedes descargar o novo cómic, "Carriandola"