O mércores e o xoves tivemos sesións de contacontos. Nenos e nenas de 4º, 5º e 6º de Primaria contaron contos, algúns creados polo propio alumnado, que fixeron as delicias dos nenos e nenas de infantil e 1º, 2º e 3º de primaria.
Parabéns a todas e todos polo magnífico traballo!!!
Esta mañá Saray, Ero e Nerea foron as madriñas e padriño lector do alumnado de Infantil. Achegáronse a contarlles Cocorico e os peques pasárono fenomenal.
Moitas
grazas! Fixéstelo de marabilla!
Dende a Biblioteca queremos animarvos a incluír na carta para o Apalpador, Papá Noel ou os Reis Magos a petición dun libro como agasallo.
Deixámosvos aquí algunhas suxestións a ter en conta para que as incorporedes entre os vosos desexos.
Fixérono xenial e xa estamos desexando que volvan
outro día.
Parabéns e moitas grazas aos dous!
Cora estavos esperando xa coas súas recomendacións de Nadal para estes días.
Pasádevos pola biblio!!!
Hoxe,
martes 3 de decembro, conmemórase o Día
Internacional da Diversidade Funcional para lembrarnos que,
independentemente da nosa condición física e persoal, temos moito que aportar.
Porque todas e todos somos diferentes, pero contamos por igual.
Na nosa escola quixemos
visibilizalo coa actividade proposta dende o Departamento de Orientación “Todas
e todos baixo o mesmo paraugas”. E dende a biblioteca quixemos aportar o noso
granciño de area cunha pequena exposición de libros para traballar nas aulas ou
levar ás nosas casas.
Convidámosvos a collelos!
Dende a biblioteca queremos agradecer a Antón e a Ana a súa participación voluntaria e desinteresada.
Seguiremos contando con vós!
Os materiais están a disposición de todo o profesorado co fin de que poidan utilizalos para o traballo co seu alumnado.
Esta mañá o alumnado de 1º
fixo unha visita á Biblioteca Pública Luís Seoane de Arcade.
Alí recibíronnos con moita
alegría Patricia, Lorena e Mar.
Esta última foi a encargada de ofrecernos unha sesión de contacontos que fixo as delicias de grandes e pequenos coa súa simpatía.
Ao remate, Patricia e
Lorena animaron á cativada a facerse socias e socios e a repetir a experiencia
calquera outra tarde para asistir ás múltiples actividades que organiza a
biblioteca municipal.
A visita foi todo un éxito
e as nenas e nenos regresaron felices ao cole.
Nenos e nenas de 4º, 5º e 6º contaron contos de medo a nenos e nenas de infantil, 1º, 2º e 3º que quedaron encantados coa actividade.
Parabéns a todos e todas polas magníficas actuacións!!!
A conmemoración do Día das Bibliotecas pretende destacar o papel fundamental que desempeñan as bibliotecas de todo tipo na construción dunha sociedade cada vez mellor informada, máis igualitaria e máis xusta.
Como pequena contribución a esta celebración, o noso alumnado de 6º de primaria elaborou un sinxelo encrucillado que nos deixa mostra das moitas variantes que caben nunha biblioteca.
Que vos parece?
Cora xa vos ten preparada unha primeira selección de libros de medo cos que ir abrindo boca de cara ao Samaín.
Atrevédesvos
a collelos?
Hoxe puxéronse en marcha as
mochilas viaxeiras en 5º e 6º de primaria.
Coma todos os anos, permanecerán
nas vosas casas durante unha semana, de
mércores a martes.
Esperamos que vos gusten e nos axudedes a valoralas e melloralas cubrindo o caderno viaxeiro coas vosas impresións, suxestións, críticas, debuxos, fotos,...
O día 1 de outubro abrimos
novamente as portas da nosa biblioteca e a estas alturas xa estamos a pleno
rendemento.
Lembrade que tamén estamos
abertos os luns, mércores, xoves e venres de 4 a 6 da tarde e para calquera
membro da comunidade.
Agardámosvos!
Este ano contaremos
novamente con tres grupos de 5º e 6º de Primaria.
As sesións darán comezo o vindeiro mes de
novembro.
Aínda estades a tempo de
anotarvos.
Animádevos!
Desde Infantil ata 6º
de primaria, cada aula investigou algunha das escritoras máis relevantes da
literatura galega e universal.
Un mural na entrada
da biblioteca serviu para realizar un pequeno xogo de recoñecemento destas
figuras da arte literaria.
Chega o verán e con el o final doutro curso escolar máis.
Desde a biblioteca esperamos que tiverades un magnífico ano e que agora poidades gozar plenamente dunhas merecidas vacacións.
Coma sempre, deixámosvos aquí as nosas recomendacións para pasar parte dese tempo acompañadas e acompañados dun bo libro.
Esta mañá Alicia e Fran, os pais de Hugo de 2º B, viñeron ao noso cole, xunto con varias compañeiras e compañeiros de Protección Civil, para ensinarnos a importancia do seu traballo ante diversos tipos de emerxencias.
Despois dunha charla informativa na biblioteca sobre as actuación que poden levar a cabo os membros de PC e diversos consellos para evitar accidentes domésticos, as nenas e nenos de 2º saíron ao patio para ir pasando en grupos por un circuito interactivo no que puideron ver os traxes e accesorios das voluntarias, manipular diversas ferramentas de traballo como os batelumes, realizar unha reanimación cardiopulmonar (RCP), entrar e activar a sirena dos coches de emerxencias ou observar como funciona un extintor.
A sesión fíxose curta, pero resultou moi formativa.
Moitas grazas a Alicia, Fran e aos demais membros de Protección Civil do Oitavén-Tea polo seu labor e por vir compartilo con nós.
Premede na imaxe que corresponde ao voso curso, marcade en cada apartado a opción que consideredes máis axeitada e dádelle a enviar.
Hoxe, e grazas ao programa de Lectura e Familias, nais, pais e
cativada de Infantil e 1º de Primaria gozaron dunha tarde moi especial na nosa
biblioteca.
Tivemos a sorte de poder contar coa presenza e a magnífica voz
de Charo Pita, que fixo as delicias
de todas e todos cos seus contos e os seus cantos.
Debido á gran demanda das familias, e para poder acoller a
todas as participantes interesadas na actividade, tivemos que organizar dous
pases.
Nunhas sesións, que se fixeron moi curtas, ofreceunos un
obradoiro de lectura, Abrazar coas palabras, cheo de
emocións e complicidade. Nais, pais, nenas e nenos falaron, riron, xogaron... e
levaron para as súas casas e nos seus corazóns algo impagable, a ledicia de
compartir momentos únicos e irrepetibles.
Despois da lectura de Eu son A, de Steve Tasane, no club de lectura de 5º pensamos que sería interesante aprender máis sobre o tema dos refuxiados e contactamos coa Asociación Diversidades de Tui para que nos deran máis información sobre a problemática dos inmigrantes e refuxiados.
Nerea, Alejandra e Paula foron as encargadas de presentar e xustificar a charla ante as súas compañeiras e compañeiros de 5º, aos que convidaron a compartir con elas esta actividade nacida no Club de Lectura.
Esta mañá Bryanna e Anabel
de 4º de Primaria foron ás aulas de 6º de Infantil para contarlles a historia
Pasiño, de James Simon.
Fixeron un traballo
marabilloso adaptando a obra a un espectáculo xenial de monicreques co que os
cativos gozaron ao máximo
Parabéns e moitísimas grazas, madriñas lectoras!
Onte
e hoxe o alumnado de 6º estivo participando nunha actividade ofertada polo
Concello de Soutomaior para aprender a xestionar emocións e sentimentos.
O
obradoiro Traballando as emocións foi
impartido na biblioteca e, a través da utilización de diversas técnicas de
cohesión, a monitora logrou que as rapazas e rapaces aprenderan nestes días a
coñecerse un pouco mellor, a controlar as súas emocións e a xestionar éxitos e
frustracións.
Foron dúas sesións cheas
de xogos e risas, mais tamén cunha boa dose de reflexión, nas que o alumnado descubriu
moitas cousas sobre autocontrol, empatía e saíu emocionalmente reforzado.
Este tipo de actividades sempre serán benvidas na nosa escola e na nosa biblioteca.
Ledicia Costas é unha das escritoras máis traducidas e
recoñecidas da literatura galega e as nenas e nenos de 4º tiveron hoxe ocasión
de coñecela e conversar con ela en primeira persoa.
A autora foi moi amable e cercana con todas e todos e
ao final asinou os exemplares do libro adquiridos polo alumnado.
Foi todo un pracer tela
entre nós!
Para conmemorar o Día do Libro e os Dereitos de Autor, dende a biblioteca lanzamos algunhas propostas de actividades ás que o alumnado respondeu moi positivamente.
Coma sempre, Cora expuxo as súas recomendacións lectoras e, ao igual que en anos anteriores, hoxe sacamos ao patio os libros expurgados ao longo deste curso para darlles unha segunda vida a través da nosa coñecida campaña “Adopta un Libro”.
Ademais, todo o alumnado do centro participou na elaboración do mural colectivo “O meu libro favorito”.
Deixamos aquí algunhas imaxes deste día.
Coincidindo co Día do
Libro, ao longo desta mañá, ademais de participar nas actividades organizadas
no propio cole, os tres grupos de 3º de Primaria realizaron unha visita á
Biblioteca Pública Luís Seoane de Arcade.
Alí recibíronos con moito
agarimo, ensináronlles as instalacións e animaron, a todos os que aínda non o
eran, a facerse socias e socios a través dunha folla de inscrición.
Mar García e Uxía Couto
foron as encargadas de animar o día coa lectura e interpretación de diversos
contos.
A rapazada rematou a
visita cun ratiño de relax para a lectura.
As nenas e nenos pasárono
moi ben e regresaron moi contentos.
De novo o noso agradecemento á bibliotecaria municipal, Patricia Rodríguez, que sempre está disposta a organizar actividades para nós e a recibirnos da mellor maneira posible.
Hoxe estivo de novo con nós Ramón Veiga, autor dunha serie de banda deseñada que gusta moito ao noso alumnado: as historias de Miñoca.
As nenas e nenos de 1º leron Miñoca e coello, unha historia sobre a amizade entre dous seres en aparencia moi distintos, pero que logran facerse amigos a pesar das súas diferenzas.
Esta mañá
coñeceron o autor do libro e crearon, coa súa axuda, as súas propias
ilustracións de Miñoca.
Ao final
marcharon cos seus libros asinados e con ganas de seguir lendo máis historias.
Moitas grazas a Ramón Veiga pola súa visita!
Hoxe as nosas madriñas lectoras, Yanira Muíños e Carmen Currás, de 4º de Primaria, visitaron a aula de 6ºB de Infantil.
Trouxéronnos o conto El patito feo, nunha versión adaptada con pictogramas.
Ao igual que en anteriores ocasións, as nenas e nenos quedaron encantados coa visita e xa están desexando repetir.
As nosas madriñas dixéronnos que o vindeiro luns irían tamén a 6ªA. Aí queda a súa promesa.
Moitísimas
grazas, madriñas lectoras!
Hoxe tocou unha nova sesión de contacontos en 6ºB de Infantil da man das nosas madriñas lectoras, Yanira Muíños e Laura Stratta, de 4º de Primaria. ocasión viñeron contarnos a historia de Ranilda.
As nenas e nenos de
Infantil quedaron encantados.
Xa estamos desexando
recibir de novo a visita das nosas madriñas!
Esta semana, no Club de Lectura “Compartindo Aventura”, o grupo de 6º A iniciamos a lectura dun novo libro: Xelís, o guieiro das botellas de mar, de Rosa Aneiros.
A historia comeza coa aparición dunha gran mancha de plásticos que navega errática polos océanos, ameazando a vida dos habitantes da illa de Otilc.
Unha lectura que nos fale de ecoloxismo, de responsabilidade e da necesidade de protexer a natureza e coidar o noso medio ambiente. Unha historia para reflexionar sobre o exceso de consumismo e facernos pensar nas nosas opcións para evitar o desastre.
Licenciada en Comunicación Audiovisual e mestra de infantil no ensino público, Leticia conversou co alumnado sobre o proceso de creación e o fío dos relatos que levan a Manuel, o neno protagonista da novela, a construír a historia da súa familia.
As rapazas e rapaces fixéronlle moitas preguntas e ao remate a autora asinou os exemplares persoais do alumnado e deixou unha dedicatoria para o centro escolar.
Foi un
pracer coñecela e desexámoslle moitos máis éxitos no futuro.
UN PASEO POLA HISTORIA
Aquí tendes xa a composición colectiva que resultou da proposta de Cora con motivo do Día da Poesía: Unha viaxe a través do tempo cunha linguaxe poética froito da imaxinación e creatividade de todo o alumnado do noso centro.
A Cora
encantoulle! Que vos parece a vós?
Clica na
imaxe para coñecelo.
Esta mañá
Yanira Muíños e Marta Vilas, de 4º B sorprenderon ao alumnado de 6º de Infantil
cunha sesión de contacontos. Sacrificando o seu tempo de recreo, ambas
decidiron ir á aula dos cativos para contarlles a historia de El
libro de Lola.
As nenas e nenos de Infantil estiveron moi atentas e atentos e pasárono moi ben.
Dende a biblioteca tamén queremos agradecerlles a Yanira e a Marta esta fermosa iniciativa.
Esperamos contar de novo con vós en vindeiras ocasións!
Relacionando a data do 8M
co noso proxecto de centro, este ano, para conmemorar o Día da Muller,
decidimos estudar a figura, o papel e a importancia de diversas mulleres ao
longo da historia.
Cada nivel encargouse
dunha etapa histórica, seguindo o mesmo esquema programado para o traballo do
alumnado das diversas aulas na elaboración do noso proxecto, Dúas
illas, mil historias.
Así chegamos a este
produto final, Mulleres de onte a hoxe.
Foi un gran traballo de
investigación das nosas nenas e nenos, que se pode admirar nas aulas e nos
corredores de todo o colexio.
Deixámosvos aquí tan só unha pequena mostra exposta na cortiza da biblioteca.
Parabéns a todas e todos!
