Chegou o final doutro curso máis e xa temos o verán ás portas.
O Equipo da biblioteca espera que o tiverades pasado moi ben ao longo deste ano, pero agora xa é tempo de gozar das tan merecidas e agardadas vacacións.
Coma sempre, Cora quere deixarvos aquí as súas recomendacións para que tamén poidades pasar parte dese tempo acompañadas e acompañados dun bo libro.
Despois de participar no club de lectura pedímosvos que avaliedes o seu funcionamento. Para iso deberedes cubrir a enquisa que vos deixamos abaixo respondendo con sinceridade a todas as cuestións.
Premede na imaxe que corresponde ao voso curso, marcade en cada apartado a opción que consideredes máis axeitada e dádelle a enviar.
O vindeiro martes, día 27 de maio, terá lugar a charla gratuíta para familias e profesorado, que impartirá María Couso, baixo o título "Cerebro e pantallas", e que foi adiada a causa do apagón do pasado mes de abril.
A actividade terá lugar no salón de actos do Manuel Padín Truiteiro a partir das 17:30 horas.
Se non vos anotastes, aínda estades a tempo de facelo.
Picade na imaxe para acceder.
Neste ano, no que lle dedicamos o
Día das Letras Galegas precisamente ás cantareiras e á nosa poesía oral, as nenas
e nenos de 4ºA recibiron hoxe na biblioteca a Vanesa Cortegoso, a nai de
Olivia, que lles veu facer unha demostración de como cantar e tocar a
pandeireta.
Todas e todos tiveron a
oportunidade de tentalo e descubriron que era moito máis difícil do que parece,
pero estamos seguras de que a máis de un lle quedaron ganas de seguir probando.
Mo itas grazas, Vanesa!
A Organización Mundial da Saúde
(OMS) lanza cada ano a campaña “Salva Vidas: Limpa as túas mans”,
que ten por finalidade concienciar sobre a importancia da hixiene das mans no
coidado da saúde.
Para conmemorar O Día
Mundial da Hixiene de Mans, esta mañá estiveron no noso cole Paula e Andrea, enfermeiras de pediatría no centro de saúde de Arcade, que
lles falaron ao alumnado de 1º de primaria da necesidade de realizar un correcto
lavado de mans.
As dúas ofrecéronnos unha
formación práctica e divertida de como previr infeccións e evitar o contaxio e
popagación de virus e bacterias.
Ademais, ao rematar a sesión,
deixáronnos un agasallo para todo o alumnado.
Moitas grazas a Paula e Andrea e ao Servizo
Público de Saúde pola iniciativa destas campañas de concienciación!
Esta mañá
os participantes no club de lectura de 5º e 6º tiveron a oportunidade de
asistir á obra teatro-musical María, catro notas para unha vida.
A
representación estivo a cargo de Andrea Castro, no papel de María Casares, e o
cuarteto Vagalume.
En conxunto
realizaron unha magnífica aproximación á biografía e carreira artística da actriz galega María Casares a través dunha
peza do máis pedagóxica e que gustou moito, tanto ao público infantil como ao
profesorado acompañante.
Esta mañá
as nenas e nenos de 4ºA foron recibidos na Biblioteca Luís Seoane para ser
parabenizados pola fermoso traballo exposto nas últimas semanas e que tivo tan
boa acollida de público.
Tamén charlaron con Mar e
escoitaron as fermosas historias que ela sempre sabe contar tan ben.
Foi unha bonita experiencia que esperamos que sirva para seguir amando a lectura e as bibliotecas, fogar dos libros.
“... viaxar a lugares inexplorados, sentir a pulsión do desexo, tremer en seguranza cun medo convulso, notar nos beizos o sabor dos labios amados... abrir un libro!”.
Manuel Núñez Singala
Ler un libro permítenos vivir mil
aventuras sen saír do sitio. Cadaquén pode escoller a temática que máis lle atraia
e deixarse levar sen esforzo.
E para facilitarvos a escolla dalgunha desas portas polas que adentrarse a outros mundos, posibles ou imposibles, este 23 de abril, como cada ano, propuxemos a actividade de Adopta un Libro. A finalidade desta proposta é a de darlles unha segunda vida a todas aquelas obras que, por falta de espazo, necesitamos expurgar da biblioteca.
Ledicia é
moi estimada no noso cole e xa case unha habitual da nosa biblioteca.
Este ano as
rapazas e rapaces de 6º leron a súa obra O neno de Lume, Premio Merlín
de Literatura 2021, un libro que nos adentra nun novo universo imaxinativo da
nosa querida autora e sobre o que conversaron con ela antes da xa tradicional
sinatura de exemplares.
Onte impartiuse no espazo infantil da biblioteca escolar un obradoiro literario ofrecido pola xornalista e especialista en literatura infantil Sonia Hermida, baixo o título de Os Camiños do Bosque.
Tras
contarnos distintas versións do conto de Carapuchiña Vermella, o
protagonismo pasou ás nenas e nenos asistentes e ás súas familias. Entre todas
e todos crearon, con diferentes elementos recollidos da natureza, un mundo
máxico enlazado con diversos camiños a través dos que imaxinar e contar
historias.
Dado o
interese e boa acollida da actividade por parte das familias, organizáronse
dúas quendas de asistencia na franxa horaria das 16:15 ás 20:00 horas da tarde.
Desde a Biblioteca esperamos que tiverades gozado coa actividade, pensada para que as nenas e nenos compartan un tempo de xogo coas súas familias.
Coma
sempre, a acollida por parte de Patri, a bibliotecaria titular, e Mar,
colaboradora habitual das actividades culturais, foi do mellorciño. O noso
alumnado pasouno xenial e regresou feliz ao cole.
Moitas
grazas por todas as atencións e polo voso bo trato sempre!
O alumnado participante no club de lectura Compartindo Aventura de 5º de primaria tivo ocasión de realizar hoxe unha actividade de poesía creativa co escritor Anxo Iglesias.
Despois
de ler e traballar o libro poético Unha nova dimensión, Premio
Merlín de Literatura Infantil 2022, Anxo Iglesias acudiu a un encontro coa
rapazada na biblioteca escolar, no que imaxinaron, crearon, cantaron... e
pasárono xenial!
Foi todo
un pracer contar coa súa visita e o alumnado quedou encantado.
Esperamos volver recibilo en vindeiras ocasións!
A Biblioteca Municipal Luís Seoane acolle desde hoxe a exposición Benvidos ao meu libro do alumnado de 4ºA de primaria.
Se aínda
non tivestes ocasión de visitala, recomendámosvos que o fagades e que
convidedes aos vosos familiares e amigos a facelo.
A
exposición prolongarase ata despois de Semana Santa e paga moito a pena.
Animádevos a visitala e a deixarlles unha valoración no libro de visitas.
Fixo unha exposición moi
interesante e as nenas e nenos remataron a sesión cunha actividade práctica.
Moitísimas grazas, Claudia!
A
función, na que as nenas e nenos participaron directamente e tiveron a oportunidade
de dar renda solta á súa faceta artística interactuando cos monicreques, serviu
para visibilizar o longo camiño que aínda queda por percorrer na procura da
igualdade entre mulleres e homes.
As nenas e
nenos pasárono xenial nun espectáculo que, con gran sensibilidade e coidado na
linguaxe, fomenta valores como a igualdade e o respecto e promove a
participación do alumnado.
Dende a biblioteca do Manuel Padín Truiteiro estamos organizando unha charla gratuíta para familias e profesorado, que impartirá María Couso, baixo o título "Cerebro e pantallas". A data elixida será o vindeiro martes 29 de abril, de 17:00 a 19:00 horas. O lugar no que se realizará esta actividade está aínda pendente de confirmación e comunicarase unha vez concertado o sitio. Trátase dunha actividade que realizaremos conxuntamente co CEIP de Ponte Sampaio e necesitariamos que nos confirmedes a vosa asistencia, a través do formulario que vos mandamos a continuación, antes do 15 de abril.
Picade na imaxe para acceder.
Esta mañá Leticia Barreiro, nai de Teo e Alejo e que xa ten colaborado coa nosa biblioteca noutras ocasións, conversou co alumnado de 3º e 6º de primaria para falarlles de ciencia e tecnoloxía.
Profesora
de tecnoloxía nun IES de Pontevedra, explicoulles ás rapazas e rapaces en que
consiste a súa profesión e amosoulles algúns proxectos de ciencia e diversos traballos de robótica e
tecnoloxía realizados co seu propio alumnado.
Foi unha charla informativa moi interesante, práctica e visual, coa que esperamos que moitas e moitos das nosas alumnas e alumnos se animen a inclinarse pola ciencia como unha opción de futuro.
Moitas grazas, Leticia!
Cora
acaba de poñer no taboleiro de recomendacións algunhas das novas adquisicións
da biblioteca.
Tendes
libros de narrativa, poesía ou informativos sobre moi distintas temáticas.
Animádevos a botarlles un ollo. Seguro que vos gusta algún.
Este ano, o alumnado de 5º leu o
libro gañador do Premio Merlín 2024, Milú e o edificio das persoas
extraordinarias, de Abel Tomé.
Abel Tomé é unha persoa
polifacética que, despois de cursar un ciclo formativo e traballar como
soldador, decidiu estudar xornalismo e realizar un mestrado en Dereitos Humanos
Esta mañá, no encontro co autor, as rapazas e rapaces tiveron a oportunidade de
profundar máis na temática da marxinalidade, a pobreza, a xustiza social, a
cooperación ou a solidariedade entre as persoas, temas fundamentais na
formación integral e ética do alumnado.
Foi unha conversa moi interesante e produtiva, que rematou coa sinatura dos exemplares do libro estudado.
Hoxe inauguramos na biblioteca a
exposición de traballos literarios realizados polo alumnado de 4ºA de
primaria.
Trátase dun pequeno percorrido
por diversas obras da literatura xuvenil universal explorada a través dos ollos
das nenas e nenos.
A exposición permanecerá aberta
do 24 ao 28 de marzo con entrada libre en horario de recreo e ao longo do resto
das mañás en compañía do profesorado de cada nivel.
Posteriormente trasladarase á Biblioteca
Pública Luís Seoane, onde permanecerá ata despois da Semana Santa.
Esta mañá recibimos na nosa biblioteca a autora Sabela Fernández Trelles.
Tras
ler os seus libros Augusta e os seus medos (en 1º) e Que queres ser de maior, pequena?
(en 2º), a escritora visitou o noso cole
para ter un encontro coa rapazada do 1º ciclo.
De xeito
amable e divertido conversou, cantou e incluso se prestou a participar nunha pequena entrevista que lle tiñan preparada as nenas
e nenos de 2ºA.
A súa
visita rematou coa sinatura dos exemplares do alumnado.
Foi un pracer recibila e conversar con ela.
Tendes xa á vosa disposición no panel de suxestións da biblioteca unha selección de libros para coñecer máis sobre a vida e o papel de moitas mulleres importantes da nosa historia pasada e presente.
Hoxe a rapazada de 2º de primaria visitou a Biblioteca Municipal Luís Seoane.
Foi unha mañá chea de historias, viaxes e risas e, despois dos contos, tocou pasalo ben explorando os libros e recunchos da biblioteca.
Moitas grazas pola boa acollida!
Hoxe o alumnado de 4º de primaria recibiu a visita de Marta Villar, autora do divertido libro Os peidos máxicos de Sultán.
Con ela falaron sobre se os peidos de Sultán
son verdadeiramente máxicos, que hai que facer para ser unha escritora e
xornalista cun can de 80 quilos ao que non lle gustan os ciclistas, como
xestionar as batallas e a la dun mastín... e unha chea de cousas máis moi
interesantes.
O encontro rematou coa sinatura
de exemplares do libro por parte da autora.
Moitas
grazas, Marta Villar!!
Andamos de entroido e no taboleiro de recomendacións da biblioteca tendes á vosa
disposición algunhas suxestións con lecturas, manualidades ou para aprender
máis sobre esta tradición tan nosa.
Esperamos que vos gusten!
